طلع الفجر وذهب الليل

نرجع لورا شويه اتنين تلاته خليهم اربعه وكافيه مش هنرجع اكتر من كده عشان محدش يقول اننا كبار اوى كده وعواجيز وننسى همومنا والتعب والارهاق من الشغل والمجهود الجسمانى والنفسى والعصبى الى مش بينتهى ولا بيخلص ولا عايز يخلص والنوم الى بيطير من العيون لما تكون فى مشكله فى الشغل ولا تسليم ولا مشاكل الاخوات ولا مشاكل الاصدقاء ولا ولا ولا وكل الضغوط الى فى حياتنا ونفصل شويه ديه التلاجه نفسها بتفصل
نروح للزمن الى كان اخر احلمنا لما نام نصحى بدرى عشان نشرب اللبن ونستنى معاد الكارتون توم وجيرى والتلفزيون يفتح عشره ونتمسمر قدامه لحد الساعه 12 الضهر وهى كانت قناه واحده بس مفيش غيرها يتيمه :) وناخد راحه معاه
ونستنى لما يجى وقت العصارى عشان ننزل الشارع ونلم بعض ونلعب الاولى او السبع طوبات او بالعروسه او بالبليل او النحله او نطير الطياره الورق ونقول امتى المغرب تهل عشان بتاع الجيلاتى يعدى وناكل منه و نرطب على قلوبنا اليوم الشاق ده هلكنا لعب ونلاقى البلكونات كلها نزلت السبت استعداد للجيلاتي الى جى
والناس الكبيره مضلمين الشقق وقاعدين فى البلكونه يسرحو مع الى رايح وجاى ويفتكروا زمان والشباب وقدمهم كوبايه الشاى وديما فى اى شارع تلاقى واحد مخصوص يرش عشان الى بيلعبو كوره يمشو من قدام بيته وهما يصممو يلعبو قدامه وتيجى الساعة خمسه تبداء وصله ام كلثوم الشارع يهدى وكله هس الراديو عالى جدا وبعدها نرجع للدوشه وعلى عشره تبدا الوصله التانيه والكل يسكت عشان يسمع الصوت الى جاى من عند الجار ويسرح مع صوت الست وبعدها نطلع ننام عشان نستعد لشقي تانى يوم ورانا لعب كتير كتير اوى و لازم نصحاله بدرى جدا